"تاريـخ جديـد" !!!

"تاريـخ جديـد" !!!

بقلم : خديـجة غـتـوري

---------------------

أخيرا جه وقتك يا مصر و اتكلمتي

بعد ما فات كتير صبرتي و اتألمتي

أخيرا حلمي هيتحقق

و أشوفك يا مصر اتقدمتي !

أخيرا هقدر أقولها و أنا متأكد

مش انتي اللي دراعك يتلوي !

وصفحات ماضيكي مش راح تنطوي

و عارفك مش هتسلمي

مش قبل ما نحاسب الغلطان

و نقبض عالجبان

و نجيب حقوق الغلابة

و نحميكي من بطش السلطان

و نرجعلك الأمان

لكن ... من كتر طيبة قلبك

بتعرفي معنى الغفران

و بتنسي ذنوب الغلطان

و ناس فيكي ...

ناس فيكي بعد تاني خطاب

نسيوا كمّ من العذاب

اللي كانوا دايقينه

و قالوا نعامله باحترام

كونه مصري ... زي أي انسان !

و ان خلاص الوقت هان

و قربنا ... و باقي شهور

بلاش نهمل الشرعية

و علشان نغيرالدستور

محتاجين لبرلمان ...

خطوات كتير ...

يا جماعة الموضوع كبير !

و ناس فيكي ...

ناس فيكي مش ناسيين

و قالوا مش هنسامحه و مش عايزين

بقى لما أصرينا و اخترنا ...

و لينا حق الاختيار

و لما قلنا هات يا وقوف

و مش ماشيين .. و مش سايبين ميداننا

تقوموا ترمونا بالمولوتوف ؟!

ده حتى لو هنموت من الخوف

و لو لشهور الحال موقوف

مش هنسيب ميدان تحريرنا

صبرنا كـتـيـــر ..

صبرنا كتير على زمن فيه الكلام ممنوع

و جه وقتنا ... نقول كلام مسموع

و تتنفذ مطالبنا !

و خايفين نرجع بيوتنا .. نتمسك ..

نتشنق .. او نتساب نموت من الجوع

و ايه يضمنلنا ان وعودَك و كلامَـك

مفهاش مماطلة او رجوع!

-----------------------

أرجوكي ...

أرجوكي يا مصر سامحيني

سواء أنا كنت دول أو دول

فانا و الله ما عندي أجندة

لكن لما عملت كده

كان قصدي مصلحتك

و اجيب حقك !!!

أخيرا يا مصر

رحل الرئيس و ساب الكــُـل

بعد سنين من الذ ُل

و خد معاه كل الشـِلـّـة

و رمينا وراهم ميت قــُـلـّـة

لكن يا مصر ...

انا عارفك بطولك و بعرضك ..

مسامحة

و هتسمحيله يموت على أرضك

لانه مهما كان ابنك

و انتي دايما شـَـريف غرضــِـك

و دايما كان عفيف حـبـك

لكن هو اللي خانك .. و خان عهدك

و ساب رجـّـالته ينهشوا لحمك

و يسرقوا خيرك

و هو ....

و لا بيسمع و لا بيشوف

و لكن بيتكلم .. و يكدب على اهلك !

أخيرا....

اوعدك مش هتدوقي طعم المرار ...

.. من تاني

و بعد سنين من التكرار

هتشوفي يا مصر تاريخ جديد !

تاريخ فيه القرار ؟ ... قرار

و مفهوش لعب قمار ...

بأحلامك !!!

فيه استقرار .. و حرية

و آخد حقي بايديا ..

و بإصرار مليانة عينيا

لا رشوة و لا محسوبية

و الشباب مليان وطنية

و إيد ولادك عفيـّـة

و مفيش قوانين غبـية

و لا في حالة طوارئ

تاريــخ مفهوش أذيــّـة

ملهاش بعد النهاردة مكان !

و سمعت صوت الشهيـــد

بيقول ..

مبروك يا أمي

كتبت حروف اسمك بدمّي

و مع كل بسمة فيكي

بتولد من جديـــد

مبروك عليا الجنة

و مبروك عليكي الحرية

مصر بعد النهاردة قوية

مصر بعد النهاردة قوية

مصر بعد النهاردة قوية !!!

--------------------------

تاريخ الإنتهاء من كتابته :

14_2_2011

"مــحاكمـة فـي شـارعنا" !!!

"مــحاكمـة فـي شـارعنا"
بقلم : خديجة غتوري
--------------------------
نزلت الصبح في الشارع
و رجعت نزلت تاني بالليل
في الصبح كان شارعنا نضيف
كله نشاط و حيويّة
الشارع كان واسع و فيه
ناس رايحة و ناس جايّة
في الرّكن هناك هناك بعيد
كان في شحّات بعربيّة
واقف يدوّر في السلاّت
على حاجة فيها تكون مرميّة
أنا كنت حاسس بالندى
و على الورود قطرات الميّة
و الإنتعاش ملى عروقي
و روحي طارت في المكان
الصبح ده أجمل هدية !!!
..............................
بالليل الشارع اتغيّر
في كل مكان يمين و شمال
بكيت على شدّة الإهمال
داق الشارع خلاص بينا
و مفيش مكان لخطاوينا
هي النضافة خسارة فينا ؟؟
ورق أزايز و كمان كياس
وقفت اصرخ في كل الناس
مفيش دم و مفيش احساس ؟؟
حرام عليكم كفاية خلاص !!
..............................
بصّولي كإني بشتمهم
و كلامي كله عذّبهم
مش علشان حاسّين بالذنب
ده شايفين إني بظلمهم !!
..............................
مسكوا في الشحّات الناس
هو ده لازم ينداس
ده الجاني معندوش إحساس
قلت غلطتكوا من الأساس
لو كل واحد إداله لقمة
مكنش دوّر في الكياس !!!
..............................
شدّوه من الركن و جابوه
ده لازم يتحاكم هاتوه
و مش فاهم ليه بيضربوه
يا ناس يا عالم ياهو
ده معملش حاجة سيبوه
مش لما نعرف حكمه إيه ؟؟
كل الناس شاورت عليه
و قالولي العيب ده كله فيه
قولولنا بقى نعمله ايه ؟
..............................
قلتلهم يعني خلاص هو
اللي عمل الهيصة دي كلّها ؟
ده لو واقف هنا من الصبح
مكنش قدر يعمل زيّها
و احنا واقفين بنتناقش
عدّى واحد أبّهة
لابس بدلة و من عربيته
في الشارع جمبي حطّها
بيني و بينها متر واحد
سيجارة جات في وقتها !!!
..............................
الصمت ساد على المكان
عرفوا انهم ظلموا الغلبان
قالنا أمشي يا جدعان ؟؟
و لا عايزيني في حاجة كمان ؟؟
محدّش قدر يرد عليه
ماهو من شوية كان شيطان !!!
..............................
أنا لو مكانه كنت أخدت
على كل ضربة جنيه
لكن من طيبته مش عارف
ان اللي حصل ده له حق فيه
المسكين كان تايه
مش عارف يعمل ايه !!!
..............................
بس اللي خلاني أستغرب
إنه لا بكى و لا اتألّم
و لا فتح بقه و اتكلّم
الظاهر انه متعوّد و متعلّم
ميظهرش حزنه و أساه
و لا جرحه اللي بينزف
و مش عارف فين دواه
و ميغلطش و يقول آآه !!
..............................

و بعد فترة سكون طويلة
واحد منهم أخيرا نطق
أنا شاركت مرة بصراحة
بس دي مرة و مش هتفرق
و مش بتأثر عالسياحة
و معلش هدّي نفسك
و عدّيها بسماحة
قعدت أضحك و بصتله
طب انت حاسس بالرّاحة ؟؟
..............................
انتهت المحاكمة باستئناف
دق قلبي و انتظرت
و كل يوم عن اللي قبله
مفيش أي اختلاف !!!
!!!!!
!!!!
!!!
!!
!

تاريخ الانتهاء من كتابته : الأربعاء 3-2-2010 م
الساعة 4:30 ص